പൂത്താലമേന്തിയ ഓര്‍മ്മകള്‍ ...

ചേമ്പില കുമ്പിളില്‍ തുമ്പയും തെച്ചിയും മുക്കുറ്റിയും പറിച്ചു നടന്ന ബാല്യം.
വീണ്ടും ഓര്‍മ്മകള്‍ പൂക്കുകയാണല്ലോ.

പൂവിളികളുടെ ഓര്‍മ്മകളിലേക്ക് ,പൂക്കളങ്ങളുടെ ഭംഗിയിലേക്ക് , പുലിക്കളികളുടെ ആരവങ്ങളിലേക്ക് . രുചിയേറും വിഭവങ്ങള്‍ അടങ്ങിയ ഓണ സദ്യയിലേക്ക്‌..
ഒരോണം കൂടി വിരുന്നെത്തുന്നു.നന്മയുടെയും ഐശ്വര്യത്തിന്റെയും സമത്വത്തിന്റെയും സമഭാവനയുടെയും സന്ദേശം വിളിച്ചോതുന്ന ഈ ഓണം എനിക്കും ആഘോഷിക്കാതെ വയ്യ.



കാരണം എന്‍റെ ഓര്‍മ്മകളില്‍ എന്നും പുതുമയോടെ നില്‍ക്കുന്ന ഓണാഘോഷങ്ങള്‍ ഉണ്ട്. പൂക്കളുള്ള ഉടുപ്പിന്റെ വര്‍ണ്ണമുണ്ട്. പായസവും കൂട്ടി കൊതിയോടെ കഴിച്ച സദ്യയുടെ രുചിയുണ്ട്. ഓരോ ഓണത്തിനും ഓര്‍മ്മകളുടെ ചിറക് വിരിയിക്കാന്‍ എന്‍റെ പ്രിയപ്പെട്ട ചേച്ചിയും ഉണ്ട്.
ആ ചേച്ചിയോടൊപ്പമുണ്ടായിരുന്ന സന്തോഷം നല്‍കിയ നിമിഷങ്ങളിലൂടെയാണ് ഞാന്‍ ഓണത്തിനെ കൂടുതലറിയുന്നത്. ഓണ ദിവസം ഞാനും ചേച്ചിയും ഉറങ്ങാതെ ഇരുന്നു ഓണ സദ്യ ഉണ്ടാക്കും ഓണത്തിന് ചേച്ചിയുടെ സമ്മാനമായി ഓണക്കോടിയും ...അങ്ങിനെ എന്തൊക്കെ ഓര്‍മ്മകള്‍..
പക്ഷെ ചേച്ചി ഇപ്പോള്‍ നാട്ടിലാണ്. എനിക്കറിയാം ഏഴാം കടലിനക്കരെ നിന്നുമൊരു ഫോണ്‍ വിളിയും കാത്ത് ചേച്ചി ഇരിക്കുന്നുണ്ടാവും. നിന്റെ ഫോണ്‍ വിളികള്‍ എനിക്ക് പായസത്തില്‍ ചേര്‍ക്കുന്ന മധുരമാണ് എന്ന് കഴിഞ്ഞ തവണ വിളിച്ചപ്പോള്‍ ചേച്ചി പറഞ്ഞു. അപ്പോള്‍ ഞാനറിഞ്ഞത് സ്നേഹത്തിന്‍റെ മധുരമായിരുന്നു .
മൊബൈലില്‍ നമ്പറമര്‍ത്തി അപ്പുറത്ത് നിന്നും ആ സ്നേഹസ്വരം കേള്‍ക്കാന്‍ ഞാന്‍ കാത്തിരുന്നു.

ചേച്ചീ...ഇത് ഞാനാണ്. ഉറങ്ങിയോ ..?

ഡീ എനിക്കറിയാം നീ വിളിക്കുമെന്ന് ...................... ചേച്ചിയുമായി ഇത്തിരി നേരം സംസാരിച്ച് ഫോണ്‍ വെച്ചപ്പോള്‍ മനസ്സില്‍ ഒരു ശൂന്യത തോന്നുന്നു. ഇവിടെ എനിക്ക് കിട്ടിയഅടുത്ത റൂമിലെ ആദ്യ സുഹ്ര്തായിരുന്നു ചേച്ചി .. കാസര്‍ക്കോട്ടുകാരി ചേച്ചിയുമായുള്ള ബന്ധം അധിക കാലം ഉണ്ടായിരുന്നില്ലെങ്കിലും .. ഇവിടെ അഞ്ചു വര്ഷം തൊട്ടടുത്ത റൂമുകളില്‍ സന്തോഷങ്ങളും സങ്കടങ്ങളും ആഘോഷങ്ങളുമെല്ലാം പരസ്പരം പങ്കു വെച്ചും സ്നേഹിച്ചും കഴിഞ്ഞു കൂടിയ നാളുകള്‍. മറക്കാനാവാത്തതായിരുന്നു ആ ദിവസങ്ങള്‍. ചേച്ചി നാട്ടിലേക്ക് പോയപ്പോള്‍ മുതല്‍ അനുഭവിക്കുന്ന ശൂന്യത ഇപ്പോഴും അതേ പോലെയുണ്ട് എന്നാലും ആ നല്ല കാലങ്ങളുടെ ഓര്‍മ്മകള്‍ ഒരുക്കൂട്ടി ഞാനും ഒരുക്കും ഒരു ഓണപൂക്കളം. അതിന്റെ മധുരങ്ങള്‍ ചേര്‍ത്ത് വെച്ച് ഒരു ഓണപായസവും ഉണ്ടാക്കും.

പൂവേ പൊലി ..പൂവേ പൊലി...ദൂരെ ദൂരെ പൂവികള്‍ കേള്‍ക്കുന്നുണ്ടല്ലോ. അതേ ഓണം അടുത്തെത്തി. നന്മയുടെ പ്രതീകമായ തുമ്പപൂക്കള്‍ ചേര്‍ത്ത് വെച്ചു എല്ലാ പ്രിയപ്പെട്ടവര്‍ക്കും ഞാനും ആശംസിക്കുന്നു, ഹൃദയം നിറഞ്ഞ ഓണാശംസകള്‍ .......